തേവള്ളി കൊട്ടാരം ,കൊല്ലം

 

തേവള്ളി കൊട്ടാരം ,കൊല്ലം 

===========================================================

തേവള്ളിഅഷ്ടമുടിക്കായലിന്റെ ഓളപരപ്പിലൂടെ ബോട്ടിൽ യാത്ര ചെയ്ത് വേണം കൊല്ലത്തെ രാജകീയ സൗധമായ തേവള്ളി കൊട്ടാരത്തിൽ എത്തിച്ചേരാൻ. കൊല്ലം ടൗണിൽ നിന്ന് 25 കിലോമീറ്റർ അകലെയായാണ് ഈ കൊട്ടാരം സ്ഥിതി ചെയ്യുന്നത്. കേരളത്തിലെ തന്നെ പ്രശസ്തമായ കൊട്ടാരങ്ങളിൽ ഒന്നാണ് ഇതു. തിരുവിതാംകൂർ രാജക്കന്മാരുടെ വസതിയായിരുന്ന ഈ കൊട്ടാരം നിർമ്മിക്കപ്പെട്ടത്, 1811നും 1819നും ഇടയിലാണ്.

ഗൗരി പാർവതി ഭായ്  തമ്പുരാട്ടിയുടെ ഭരണകാലത്താണ് ഇതു നിർമ്മിക്കപ്പെട്ടത്. തിരുവിതാംകൂർ രാജക്കന്മാർ ബ്രിട്ടീഷ് ഉദ്യോഗസ്ഥരുമായി കൂടിക്കാഴ്ച നടത്തിയിരുന്നത് ഈ കൊട്ടാരത്തിൽ വച്ചായിരുന്നു. കൊട്ടാരത്തിനു ചുറ്റുമുള്ള പച്ചപടർപ്പും മുൻവശത്തെ അഷ്ടമുടി കായലുമൊക്കെ കൊട്ടാരത്തിനു കൂടുതൽ ഭംഗി  നൽകുന്നു. ബ്രിട്ടീഷ്, ഡച്ച്, പോർച്ചുഗീസ് നിർമ്മാണ ശൈലികൾ സമന്വയിപ്പിച്ചാണ് ഈ കൊട്ടാരം നിർമ്മിച്ചിരിക്കുന്നത്. ചുണ്ണാമ്പുകല്ലും ചെങ്കല്ലും ഉപയോഗിച്ച് നിർമ്മിച്ചിരിക്കുന്ന കൊട്ടാരത്തിന്റെ മനോഹാരിത പറഞ്ഞറിയിക്കാൻ കഴിയാത്തതാണ്.

കൊട്ടാരത്തിന് മുന്നിലായി ഒരു ശാസ്താ ക്ഷേത്രമുണ്ട്. ഒരു നായയുടെ ഓർമ്മയ്ക്കായി നിർമ്മിച്ച ചെറിയ ഒരു സ്മാരകം കൊട്ടാര പരിസരത്ത് കാണം. കൊട്ടരത്തിൽ താമസിച്ചിരുന്ന ഒരു സായിപ്പും അഷ്ടമുടി കായലിന് അപ്പുറത്ത് താമസിച്ചിരുന്ന ഒരു മലയാളി പെൺകുട്ടിയും തമ്മിലുള്ള പ്രണയകഥയിലെ ഒരു കഥാപാത്രമാണ് ഈ നായ. ഇവർ തമ്മിലുള്ള പ്രണയ ലേഖനങ്ങൾ കൈമാറിയിരുന്നത് ഈ നായായിരുന്നു. ഒരു ദിവസം ഈ നായയെ ചത്തനിലയിൽ കണ്ടെത്തുകയായിരുന്നു. നായ ചാകാനുള്ള കാരണം എന്താണെന്ന് ആർക്കും അറിയില്ല. വിശ്വസ്തനായ ഈ നായയുടെ ഓർമ്മയ്ക് ഇവിടെ സ്മാരകം നിർമ്മിച്ചിരിക്കുന്നത്.